الجمعة، 4 ديسمبر 2009

لماذا؟؟؟؟؟؟؟




لماذا علي دوما أن احتمل

لماذا تطول أيامي في انتظار الأمل

لماذا تغيب شمس آمالي في عينيك

وتموت كل بسمة لي بين يديك

لماذا .... تقسو على قلب احبك

ودائما تسقيه من نار غدرك

ولماذا أوجه إليك سؤالي

وأنت سبب أنيني وهواني

علي أن أسال قلبي لماذا .....أهداك حبا كهذا... ؟؟؟؟

هو احنا ليه بقينا كدة؟؟؟؟


احنا ليه بقينا كدة؟؟؟

كدة ده بقا يطلع ايه؟؟؟

اقولكم

كدة ده يعني بقا كل واحد فينا عنده حاجة واحدة شاغلاه ... يفضل يفكر فيها... عاوزها تحصل امتى ... وازاي .... طيب هي اتاخرت ليه؟؟؟

طيب هي خلاص مش هتحصل.... طيب ولو محصلتش انا هعمل ايه؟؟؟


ايه في ايه؟؟؟

ليه كل ده؟؟؟


ليه ممكن تحبس نفسك ودنيتك في اطار حاجة واحدة.

مينفعش تبقا حياتنا كلها متوقفة على حاجة واحدة

لان بمنتهى البساطة الحاجة دي ممكن متتحققش ... لاي سبب ممكن متحلصش

ساعتها بقا هنعمل ايه.... نروح ننتحر بقا.... ولا نفضل نبكي على الحاجة اللى اتمنيناها ومحصلتش لحد ما نموت بس المرة دي نموت من الاكتئاب...

انا شوفت ناس كتير كدة .... وبصراحة ابتديت اخاف ليكون ده مرض ومعدي وانا كمان هبدأ افكر بالشكل ده...

انا قابلت في حياتي كذا شخصية من النوع ده

اللى هي الشخصية اللى حياتها كلها متوقفة على حاجة واحدة ولو محصلتش الحاجة دي او اتأخرت او اتلخبطت ياااااااااه تقوم الدنيا ومتقعدهاش

اكتئاب وحزن وانعزال ورغي مش بيخلص في اطار التحسر على اللي بيحصل

ببقا عاوزة اصرخ واقول ايه بقا هو فيه ايه ... ما تهدوا شوية

الدنيا موقفتش على كدة

يا جماعة انا مش بقول ان الانسان مايتمناش حاجة او ميزعلش لما الحاجة دي متجيش لاااااااااااا خالص

طبيعي نحلم وطبيعي نزعل لما الحلم ما يتحققش

انما جنب الحلم ده يبقا في حلم وحلم وحلم

تبقا حياتنا فيها 1 ,2,3,.......

مش تبقا حياتنا متوقفة على 1 وبس ولو محصلش يبقا ملوش لازمة بقا اننا نتمتع بوجود 2 ,3 ,4,5......

في ناس هتقولي ما يمكن مفيش 2 , 3 , 4 , .... في حياتنا هقولهم لا كل واحد في الدنيا يقدر يفتح شباك دنيته على الحياة هيلاقي دنيا كبيرة وواسعة ... بتلف وبتدور ,,,, اوقات بتجري ,,, اوقات بتحبي,,, بس في الاخر هي ماشية

مش واقفة لحد او على حاجة.

الى كل شخصية موقفة دنيتها على امل يمكن يكون اتأخر شوية , او يمكن مش هيجي خالص لانه مش مكتوبلنا:

حبي الدنيا

واعرفي ان فيها....عيلة .... اصحاب... شغل.... هوايات.... سفر .... فسح.... اعمال خير....قرب من ربنا.... متعة ...شقا... تفكير ....حلم .... وحاجات تانية كتير.

متوقفش دنيتك على وظيفة طارت منك.... هيجي غيرها,بس متنساش وانت بتسعى لغيرها انك تستمتع بالحاجات التانية اللى في دنيتك لحسن يجي عليك يوم تحس فيه ان حياتك ضاعت.... وساعتها متلومش غير نفسك.


متوقفيش حياتك على عريس اتأخر, او صديقة خزلتك... وافتكري انك انتي اللى بتخنقي نفسك بايدك .... عيشي كل الحاجات ومتخليش العريس اللى اتخر يبقا محور دنيتك ....والا هتلاقي دنيتك عبارة عن فرااااااااااااااغ واسع وانتي تايهة فيه.



هكرر تاني كلامي

انا مش بقول منحلمش , او منزعلش على حلم ضاع.... انا بقول ياناااااااااااس يا هووووووووو الدنيا فيها حاجات كتييييييييير واحلام اكتر

عيشوا كل حاجة على قد ما تقدروا .... محدش عارف ايه هيجي قبل ايه ولا ايه هيبقا احلى من ايه.


يارب كل واحد عنده حلم ... حلمه يتحقق....


ودول كانوا أول شوية كلام..... أهووو كلاااااااااام والسلاااااااام.

وسلام.